Бақытты отбасы – ел қуаты
№3 кітапхана Тәуелсіздігіміздің 30 жылдығына орай «Парасат жолы» жобасы аясында «Бақытты отбасы – ел қуаты» атты таным сағатын назарларыңызға ұсынады.
Шараның мақсаты: Оқырмандарға отбасы құндылығы жайлы айту, өз отбасы игілігі үшін талмай еңбек етуге, ұлттық салт – дәстүрді берік ұстау, өз отбасына құрмет сезімін дамыту керектігін ұғындыру . Адам баласы өмірді отбасы арқылы тани бастайды, яғни ең маңызды базалық танымды отбасынан алады. Себебі, отбасы – бала тәрбиесінің ең алғашқы ұжымы.Адамның жеке басының қалыптасуы отбасынан басталады.Оның ер жетіп өсуі, бойындағы алғашқы адамгершілік белгілер отбасында қалыптасады, сондықтан да туған үйдің жылуы – оның көкірегінде көп жылдар бойы сақталып, мәңгі есінде жүреді.Отбасы – табиғат сыйлаған кереметтердің бірі. Жеке адамның бойындағы ар-ұятын , ақыл-ойын ,адамгершілігін , мәдениеттілігін тәрбиелеуде отбасы – алғашқы қадам.Отбасы – өте қажетті, басқадай еш нәрсемен өзгертуге болмайтын баспалдақ. Отбасында адам бойындағы асыл қасиеттер жарқырай көрініп, қалыптасады. Отанға деген ыстық сезім – жақындарына, туған-туысқандарына деген сүйіспеншіліктен басталады. Сол себепті де біз отбасын Отанның кішкентай бір бөлшегі ретінде қарастырамыз.
