«Робот – техника заманының талабы»
№20 кітапханада «Жазғы кітап» жобасы аясында «Робот – техника заманының талабы» атты көрме-хобби болып өтті. Танымдық шараға «Арай» бастауыш мектебінің жазғы тынығу лагерінің тәрбиеленушілері қатысып, ғылым мен технология әлеміне қызықты саяхат жасады.
Шараның мақсаты – робот техникасы туралы танымдық білім беру, балалардың қоршаған ортамен тығыз қарым-қатынас жасауына ықпал ету, шынайы өмір мәселелеріне қызығушылығын арттыру және шығармашылық ойлау қабілетін дамыту.
Іс-шара барысында балаларға роботтардың пайда болу тарихы, олардың қоғамдағы орны мен бүгінгі өмірдегі маңызы туралы арнайы дайындалған слайд арқылы кеңінен мәлімет берілді. Балаларды толғандырған маңызды сұрақтардың бірі – «Робот адам орнын толықтай алмастыра ала ма?» Бұл сұраққа жауап іздеу мақсатында балалар жазушысы Ділдар Мамырбаеваның «Роботтар отбасы» атты әңгімесі талқыланды. Әңгіме кейіпкерлерінің іс-әрекеттері арқылы роботтар қаншалықты ақылды әрі еңбекқор болғанымен, адамға тән мейірім, қамқорлық, жанашырлық пен ізгі қасиеттерді ешқашан толықтай алмастыра алмайтыны түсіндірілді.
