«Домбыра - асыл мұра»
№6 кітапхана Ұлттық домбыра күніне орай «Зейнеткерлерге жартылай стационарлық жағдайда арнаулы әлеуметтік қызмет көрсету орталығы» коммуналдық мемлекеттік мекемесінде ұлттық өнерді ұлықтау, домбыраның қадір-қасиетін насихаттау мақсатында
«Домбыра - асыл мұра» атты мәдени кеш ұйымдастырды.
Шара барысында А.Тоқмағамбетов атындағы қалалық мәдениет үйі жанынан құрылған «Күй керуен» домбыра үйірмесінің жетекшісі Қалибекқызы Ләззат пен үйірме оқушылары қазақтың күй өнерінің жауһарлары – «Балбырауын» және «Адай» күйлерін орындап, көрермен ықыласына бөленді.
Қазанғап атындағы жоғары музыкалық колледжінің дәстүрлі ән бөлімінің 2-курс студенті Темірбай Ағжан «Жиенбайдың жыр бастауы» (Жиенбай жырау) және «Өмір сырлары» (Кете Жүсіп) жыр-термелерін орындап, ұлттық өнердің рухани құндылығын дәріптеді. Шара аясында «Домбыра - асыл мұра» атты кітап көрмесі ұйымдастырылып, оқырмандарға домбыра өнері, қазақтың күйшілік дәстүрі мен ұлттық мәдениетке қатысты әдебиеттер таныстырылып, кеңінен насихатталды.
