Абай – дана, Абай – дара қазақта
10 тамыз- Абай күні
Абай Құнанбайұлының туғанына 181 жыл толуына орай, қалалық мәдениет және тілдерді дамыту бөлімінің ұйымдастыруымен Абай аллеясында «Абай – дана, Абай – дара қазақта» атты әдеби-сазды кеш өткізілді.
Шара аясында кітапхана қызметкерлерінің ұйымдастыруымен «Абайдың сөзі – қазақтың бойтұмары» атты кітап көрмесі ұйымдастырылды. Көрмеге Абай Құнанбайұлының шығармалары, қара сөздері, ақынның өмірі мен шығармашылығы туралы зерттеу еңбектері, әдеби-сын кітаптар қойылды.
Кітап көрмесі арқылы көпшілікке Абайдың мол әдеби мұрасы таныстырылып, ақын шығармаларын оқуға шақырылды. Көрме келушілердің қызығушылығын арттырып, ұлы ойшылдың рухани мұрасын кеңінен насихаттауға мүмкіндік берді.Әдеби-сазды кеш барысында «Көркем сөз оқу» үйірмесінің оқушылары ұлы ақынның өлеңдерін мәнерлеп оқып, көрермендерге Абай шығармаларының терең мазмұны мен тағылымын жеткізді.
Сонымен қатар, Абай күніне арналған викториналық сұрақ-жауап ұйымдастырылып, қала тұрғындары белсенді қатысып, өз білімдерін сынады. Белсенді қатысушыларға арнайы сыйлықтар табысталды.
Кеш барысында Абайдың әндері шырқалып, ақынның рухани мұрасы мен өнегелі ойлары дәріптелді.
